Միայն Գ.Ծառուկյանի պետականամետ մտածողության արդյունքում է, որ այսօր կանգուն է «ԱրարատՑեմենտ» գործարանը

Լենա Հովհաննիսյանը ֆեյսբուքյան իր էջում գրում է.

 

Յուրաքանչյուր ոք կարող է հայտարարություններ անել, բայց որքանով են այդ հայտարարությունները համապատասխանում իրականությանը ոչ ոք չի կարող ասել, քանի դեռ դրանք չեն ապացուցվել փաստերով: Եվ ինչո՞ւմն է խնդիրը: Վերջերս պատգամավոր Հայկ Գևորգյանը Ազգային ժողովում հայտարարեց, որ Գագիկ Ծառուկյանը ձեռք է բերել «ԱրարատՑեմենտ» գործարանը 200,000 դոլարով, որին ի պատասխան Գագիկ Ծառուկյանը հայտարարեց, որ ով ապացուցի այդ փաստը, ապա կնվիրի գործարանը նրան: Իհարկե, դա մի մեծ ոգևորություն առաջացրեց մի շարք «ձրիակերների» շրջանակներում և նրանց շարքից Հայկ Գևորգյանը «կցկտուր» հայտարարեց, թե ապացույցներ ունի: Սակայն հարկ եմ համարում մեր նորելուկ պատգամավորին տեղեկացնել մի փաստ, որի վերաբերյալ ամենայն համոզվածությամբ նա տեղյակ չէ, քանի որ նրա սիրած գործելավոճը մեծ-մեծ խոսալն է, բայց այդ խոսքերը հիմնովին փութ են:
Նախքան Ծառուկյանի կողմից կգնվեր գործարանը, ուժի մեջ էր մտել Կառավարության 2002 թվականի սեպտեմբերի 12-ին N 1465-Ա որոշումը, որի 3-րդ կետով սահմանվում էր, որ գործարանը գնել ցանկացողները բացի 200 հազար դոլարից պետք է ստանձնեն «ՀայՌուսգազարտ»-ի նկատմամբ գործարանի ունեցած 6,8 միլիոն դոլարի պարտավորության կատարումը։ Արդեն իսկ պարզ է դառնում, որ նորաթուխ պատգամավորի կատարած հայտարարությունը անհիմն էր, քանի որ պարզ տրամաբանելու դեպքում հասկանալի է դառնում, որ գործարանը գնողը նախ պետք է կատարեր այդ պարտավորության մարումը և այնուհետև նոր իրավունք կունենար ձեռք բերել գործարանը 200 հազար դոլար սահմանված գնով: Եվ բացի այդ անտեղի էին պատգամավորի կողմից արված հայտարարություները, թե կար ընկերություն, որը ցանկանում էր ներդրում կատարել գործարանում և անհասկանալի պատճառներով չի կատարել: Իրականում ներդրող եղել է և դա շվեյցարական «Հոլլ Սիմ» ընկերություն էր, որն նախնական կատարել էր 300 հազար դոլարի ներդրում՝ ուսումնասիրություններ կազմակերպելու համար, սակայն տեսնելով, որ հեռանկարային չի իրենց կատարած ներդրումները, որոշել են այլևս չշարունակել գործարանի շահագործման ծրագիրը: Եվ սա սովորական երևույթ է, քանի որ ցանկացած բիզնես էլ ձգտում է առավելագույն եկամուտներ ապահովել և ոչ բոլոր ընկերությունները կցանկանան ներդրում կատարել Հայաստանում: Այս համատեքստում էլ առանձնահատուկ է Ծառուկյանի նվիրվածությունը սեփական պետությանը, ով անկախ ամեն ինչից ստանձնել էր գործարանը վերագործարկելու բարդ և միևնույն ժամանակ պատվաբեր գործը:
Հարկ եմ համարում նշեմ նաև, որ գործարանը չի աշխատում միայն այն պայմանով, որ այն գնում են: Այն աշխատացնելու համար հարկավոր են համապատասխան մասնագետներ, որոնք գործարանի չաշխատելով պայմանավորված հեռացել էին Հայաստանից: Իսկ, երբ այն գնվեց Ծառուկյանի կողմից համապատասխան մասնագետներ հրավիրվեցին գործարանը վերագործարկելու համար, ինչով հերթական անգամ կյանք տրվեց Արարատ քաղաքին, քանի որ տեղի բնակիչները հնարավորություն ունեցան աշխատել իրենց երկրում:
Գիտեք այնքան հեշտ է ապատեղեկատվություն տարածել, մեծ-մեծ խոսել: Հեշտ է դիմել մանիպուլացիոն գործողությունների, փորձելով ինչ-որ ինտրիգներ հրահրել: Սակայն հարկ եմ համարում ասել, որ դուք դեռ ոչինչ չեք արել մեր պետության զարգացման համար և պատգամավոր եք դարձել զուտ պատահականության սկզբունքի հիման վրա: Կոչված եք պաշտպանելու Հայաստանի Հանարապետության քաղաքացիների շահը, բայց փաստացի մանիպուլացիաներն ավելի կարևոր են Ձեզ համար: Սթափվեք: