Չինաստանում հաջողությամբ արձակվել է կապի արբանյակներ տեղափոխող Zhuque-2E Y6 հրթիռը

Չինաստանը հաջողությամբ արձակել է հեղուկ վառելիքով աշխատող Zhuque-2E Y6 («Չժուցյուե») կատարելագործված հրթիռ-կրիչը, որը կապի երկու արբանյակ է դուրս բերել ուղեծիր։ Այս մասին հայտնել է «Xinhua» գործակալությունը։

Հրթիռը մեկնարկել է «Դունֆեն» կոմերցիոն արձակման հրապարակից՝ տեղական ժամանակով ժամը 16:23-ին (Երևանի ժամանակով՝ 12:23-ին)։

Zhuque-2E Y6-ը նախանշված ուղեծրեր է դուրս բերել Qianfan DTC 01 և China Mobile 02 արբանյակները։ Առաքելությունը ճանաչվել է հաջողված։

Այս արձակումը թվով ութերորդն էր Zhuque-2 սերիայի հրթիռ-կրիչների համար։

Zhuque-2-ը միջին դասի հրթիռ-կրիչ է, որը մշակվել է «LandSpace» ընկերության կողմից։ Որպես վառելիք այն օգտագործում է հեղուկ թթվածին և հեղուկ մեթան։ Սա մեթանային վառելիքով աշխատող աշխարհում առաջին հրթիռն է, որը դուրս է եկել տիեզերական ուղեծիր։