Վթարի հետեւանքով մահացած ուղեւորները վերադառնում էին Արևմտյան Հայաստան ուղեւորությունից 

Գյումրի-Լանջիկ ավտոճանապարհին գիշերը տեղի ունեցած ողբերգական ավտովթարի դեպքի առթիվ ՀՀ քննչական կոմիտեի Շիրակի մարզային քննչական վարչությունում նախաձեռնվել է քրեական վարույթ ՀՀ քրեական օրենսգրքի 342-րդ հոդվածի 3-րդ մասի հատկանիշներով։

Նշենք, որ ողբերգական վթարի ուղեւորները վերադառնում էին Արեւմտյան Հայաստան ուղեւորությունից։ Տեղեկությունը «Հրապարակի» հետ զրույցում հաստատեցին «Համշեն» տուրիստական ընկերությունից, նշելով, որ վթարի ենթարկված ուղևորներն իրենց տուրիստական ընկերության միջոցով մեկնել էին Արևմտյան Հայաստան:

Տուրիստական ընկերության աշխատակիցը մեզ հետ զրույցում ասաց, որ լուրը հաստատելուց բացի ոչինչ ասել չի կարող. «Հավանաբար հասկանում եք՝ այստեղ ինչ վիճակ է հիմա, ես ոչ մի հարցի չեմ կարող պատասխանել, տնօրենը կկապվի Ձեզ հետ», - նշեց մեր զրուցակիցը:

Հիշեցնենք, գիշերը Երևան-Գյումրի ավտոճանապարհի 90-րդ կմ-ին բախվել են «Volkswagen» մակնիշի ուղևորափոխադրող միկրոավտոբուսը և «ZIL» մակնիշի բեռնատարը (վարորդ՝  Հ․ Պ․, ծնված 1990 թ.):

Գյումրու ԲԿ-ից ստացված տեղեկատվության համաձայն՝ Գյումրու ԲԿ են հոսպիտալացվել տուժածներ Մ. Գ.-ն (ծնված 1996 թ.), Լ. Ղ.-ն (ծնված 1989 թ.), Հ. Պ.-ն (ծնված 1990 թ.), Պ. Ա.-ն (ծնված 1985 թ.), Է. Ք.-ն (ծնված 2000 թ.) և Է. Ս.-ն (ծնված 1984 թ.): Այնուհետև Է. Ս.-ն (ծնված 1984 թ.) տեղափոխվել է Երևանի «Էրեբունի» ԲԿ:

ՃՏՊ-ի հետևանքով զոհվել է 11 քաղաքացի: