Բոլոր գերիներին անխտիր բերելու ենք. Արցախի նախագահ

Արցախի նախագահ Արայիկ Հարությունյանը ևս մեկ անգամ ընդգծում է, որ հայկական կողմը վերադարձնելու է ադրբեջանական գերության մեջ գտնվող բոլոր գերիներին: «Արմենպրես»-ի փոխանցմամբ` Արայիկ Հարությունյանն այս մասին ասաց անհետ կորած զինծառայողներից մեկի ծնողի հետ զրույցում:

«Աստված տա, որ գերի լինի, որովհետև բոլոր գերիներին բերելու ենք, անխտիր: Չեմ ասում` ինչ ժամանակահատվածում, բայց բոլորին բերելու ենք»,- Արցախի Իշխանաձորի հատվածում անհետ կորած զինծառայողի ծնողին ասաց Հարությունյանը:

Նա Արմավիրում մասնակցում էր ԱԺ նախկին պատգամավոր, «Սև հովազ» ջոկատի հրամանատար Ռուստամ Գասպարյանի հիշատակին նվիրված միջոցառմանը, որի ընթացքում էլ հենց նրան մոտեցել էր անհետ կորած զինծառայողի ծնողը:

Հայաստանի և Ադրբեջանի միջև պայմանավորվածություն է ձեռք բերվել՝ գերիներին փոխանակել «բոլորը բոլորի դիմաց» սկզբունքով: Մեկ անգամ արդեն փոխանակում տեղի է ունեցել դեկտեմբերի 14-ին. Հայաստան է ժամանել 44 հայ գերի, Ադրբեջան է ուղարկվել 12 գերի և երկու դատապարտյալ:

Ավելին