Տոնի Կրոս․ Հնարավոր չէ ամեն տարի նվաճել Չեմպիոնների լիգայի գավաթը

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

Մադրիդի «Ռեալի» գերմանացի կիսապաշտպան Տոնի Կրոսը մեկնաբանել է ձախողումը Չեմպիոնների լիգայի կիսաեզրափակիչում։ Պատասխան խաղում Արքայական թիմը 0:4 հաշվով պարտվել է Անգլիայի չեմպիոն «Մանչեսթեր Սիթիին»։ Մադրիդում տեղի ունեցած առաջին խաղն ավարտվել էր ոչ ոքի՝ 1:1:

«Երբ պայմանագիր ես կնքում «Ռեալի» հետ՝ լինի խաղացող, թե մարզիչ, հասկանում ես, որ այստեղ սպասելիքներն ու պահանջները ամենաբարձրն են՝ միայն հաղթանակներ եւ տիտղոսներ։ Նախորդ 10 տարիներին 5 անգամ նվաճել ենք Չեմպիոնների լիգայի գավաթը, բայց հնարավոր չէ ամեն տարի հաղթել այս մրցաշարում»,- Տոնի Կրոսի խոսքը մեջբերում է ՈւԵՖԱ-ի մամուլի ծառայությունը։

«Ռեալը» Չեմպիոնների լիգայում հաղթանակների քանակով ռեկորդակիրն է՝ 14 տիտղոս։

Չեմպիոնների լիգայի գավաթը հունիսի 10-ին Ստամբուլում կվիճարկեն «Մանչեսթեր Սիթին» ու Միլանի «Ինտերը»։