Դատարանը քննում է «Մարտի մեկի» գործով սպանության համար մեղադրվող Գեղամ Պետրոսյանի ձերբակալան որոշման դեմ բողոքը

Երեւան քաղաքի ընդհանուր իրավասության դատարանում դատավոր Գագիկ Պողոսյանի նախագահությամբ քիչ առաջ մեկնարկեց «Մարտի մեկի» գործով Զաքար Հովհաննիսյանի սպանության մեջ մեղադրվող Գեղամ Պետրոսյանի ձերբակալան որոշման դեմ բերված պաշտպանական կողմի բողոքի քննությունը: Գեղամ Պետրոսյանն այս պահին դատարանում է։  Նշենք, որ դատարանում այսօր կքննվի նաեւ նրան կալանավորելու քննիչի միջնորդությունը:

Նշենք, որ երեկ երեկոյան գնդապետ Պետրոսյանին մեղադրանք է առաջադրվել ՀՀ քրեական օրենսգրքի 104 հոդվածի 1-ին մասի հատկանիշներով (Սպանությունը՝ ապօրինաբար մեկ ուրիշին դիտավորությամբ կյանքից զրկելը՝ պատժվում է ազատազրկմամբ՝ ութից տասնհինգ տարի ժամկետով): Գեղամ Պետրոսյանը ձերբակալվել է հունիսի 4-ի երեկոյան մարտի 1-ից 2-ն ընկած ժամանակահատվածում Երևան քաղաքում տեղի ունեցած իրադարձությունների վերաբերյալ ՀՀ հատուկ քննչական ծառայությունում քննվող քրեական գործի շրջանակներում։ 2008 թվականի մարտի 1-ի դրությամբ նա զբաղեցրել է ՀՀ ոստիկանության զորքերի հրամանատարի տեղակալի, նույն ինքը` շտաբի պետի պաշտոնը։ Նշենք, որ մինչ այս պահը «Մարտի 1–ի» 10 սպանությունների համար որևէ անձ քրեական պատասխանատվության չի ենթարկվել։