«Էլենի օրագիրն» ամռանը կավարտվի. սցենարիստը՝ լարված սերիաների և երրորդ եթերաշրջանի մասին

Tert.am Life-ին հայտնի է դարձել, որ «Շանթ» հեռուստաընկերության «Էլենի օրագիրը» նախագիծը շուտով կավարտվի: Սիրված հերոսների մասնակցությամբ պատմությունը մոտենում է հանգուցալուծմանը: Նախագծի սցենարիստ Անի Մաղաքյանը մեզ հետ զրույցում առաջին անգամ խոսել է եզրագծին մոտենալու մասին: Նա նշեց, որ հունիսին նախագծի ավարտվելու լուրերը չեն համապատասխանում իրականությանը, սակայն ամռանը հեռուստասերիալը կավարտվի:

«Սյուժետային որոշ կտրուկ փոփոխությունների պատճառով երկրպագուների մոտ «խուճապ» սկսվեց, ստեղծվեց տպավորություն, որ սերիալը հունիսին վերջանում է: Ամեն դեպքում, երկրպագուների հարցերն ու մտահոգությունները, չգիտես ինչու, հենց այս ամսվա հետ են կապված։ Իհարկե, «Էլենի օրագրի» էջերը մի օր կվերջանան, ֆինալը սարերի ետևում չէ, բայց ոչ հունիսին»,- ասաց Անին, իսկ հստակեցմանը՝ «սարերի հետևում» չգտնվող ավարտն ամռա՞նը կլինի, պատասխանեց՝ այո, ամառվա ընթացքում, բայց ավելի ուշ:

Սա նախագծի երկրորդ եթերաշրջանն է: Սցենարիստը դեռ վաղ է համարում խոսել՝ արդյոք կունենան նաև երրրոդ եթերաշրջան: