Մարդը զարգանում է, երբ գիրք է կարդում․ նոր գաղափարներ, մտքեր են ի հայտ գալիս. Առնո Վարդանյան (տեսանյութ, լուսանկարներ)

Փետրվարի 19-ին Հայաստանում նշվում է Գիրք նվիրելու օրը: Օրվա ընտրությունը պատահական չէ. 1869 թվականի փետրվարի 19-ին ծնվել է Ամենայն հայոց բանաստեղծ Հովհաննես Թումանյանը:

 

Օրվա առթիվ օրենսդիր մարմին էին այցելել Երեւանի Անտոն Չեխովի անվան թիվ 55 դպրոցի աշակերտներն ու ուսուցիչները: Խորհրդարանի հյուրընկալ գրադարանում նրանց դիմավորել, ընթերցանության կարեւորությանն են անդրադարձել ԱԺ պատգամավորներն ու աշխատակազմի ներկայացուցիչները: 

 

Միջոցառումն անցել է անկաշկանդ մթնոլորտում։ Պատգամավորներն ու աշակերտները գրքեր են միմյանց նվիրել, ասմունքել Հովհաննես Թումանյանի քառյակներից:

 

Աշակերտներից Առնո Վարդանյանն իր խոսքում նշել է․

 

«Մարդը զարգանում է, երբ գիրք է կարդում․ նոր գաղափարներ, նոր մտքեր են ի հայտ գալիս, բառապաշարդ է մեծանում, գիրքը մարդու կյանքում շատ կարևոր դեր ունի»։ 

 

Հանդիպման ավարտին հյուրերը շրջել են Ազգային ժողովի թանգարանում, ծանոթացել Խորհրդարանի շենքի պատմությանն ու թանգարանի ցուցանմուշներին: