Հուրգադայում մնացած ՀՀ քաղաքացիները վաղը կվերադառնան Երեւան. Քաղավացիայի կոմիտե

Քաղավիացիայի կոմիտեն հավաստիացում է ստացել ավիափոխադրող ընկերությունից, որ վաղը Հուրգադա–Երեւան չվերթը կիրականացվի, Եգիպտոսի Հուրգադա քաղաքից ՀՀ քաղաքացիները կժամանեն Երեւան եւ ցանկացողները Երեւանից կմեկնեն Հուրգադա։ Այս մասին NEWS.am-ի հետ զրույցում ասաց Քաղավիացիայի կոմիտեի Օդային փոխադրումների կարգավորման վարչության պետի տեղակալ Ստեփան Փայասլյանը։ 

Նրա խոսքով՝ սակայն, հետագայի համար Հուրգադա–Երևան և հակառակ ուղղությամբ չվերթների իրականացման հեռանկարն այնքան էլ հստակ չէ, քանի որ գումարային խնդիրները դեռ լուծված չեն։

Ստեփան Փայասլյանը նաեւ նշեց, որ նախնական տեղեկություններով՝ երկու պատճառ կա չվերթի հետաձգման համար։ «Մի կողմը պնդում է, որ գումարային խնդիր է, մյուս կողմը պնդում է, որ օդանավի բացակայության հարցն է»:

Ավելի վաղ Եգիպտոսում ՀՀ դեսպանությունը տեղեկացրել էր, որ հուլիսի 25-ին Հուրգադա-Երեւան թիվ OTF 3703 չվերթի չեղարկման պատճառով այս պահի դրությամբ Հուրգադայում գտնվում է մոտ հարյուր ՀՀ քաղաքացի։

Հիշեցնենք, որ հուլիսի 23–ին էլ չեղարկվել էին Երեւան– Շարմ Էլ Շեյխ եւ հակառակ ուղղությամբ չվերթները։